Joske

’t Es vôo te blêiten dat ie aljène in zyn oekske krüpt
Met al die grôote vroag’n van ’t leven
Ie es ’t geweune want zyn moeder blêit
Zyn broere blêit moar zyn pa blêit nie mjèr
Die’n heet al lange ipgegev’n

Zjoske kwam were van skole ’t was moandag
De toafels van zesse woar’n goe gelukt
Totdat ie te lange deur de rütte stoarde
En zyne mjèster hem onder zyn voet’n gaf
Zjoske komt met zyn fietske in de garage
Vôo zynen bal te zoek’n
Ie ziet doar de skoen’n van zyn voad’r in de lucht
En zyn bjèn’n doarbov’n ’t was een vrjè roar zicht

Woarom zyn w’ aan ’t lev’n woarom goan we dôod
En woarom stoan we rechte woarom word’n we grôot
En woarom keun’n we lach’n van woar kom’n die troan’n
En woarom stoan de bjèn’n bov’n de voet’n

Paatje, speel dje gie nu verstopperke
‘k Hee u gevond’n, paatje
‘k Zie uw voet’n hang’n
Kom moa noa beneen

Moa paatje zweeg en de voet’n blev’n hang’n
En de bjèn’n doarbov’n en ’t bleef stille
En Zjoske zet een stapke vôoder
Ziet ’t gezicht van zyn paatje ’t kykt noa beneen

Woarom zyn w’ aan ’t lev’n woarom goan we dôod
Woarom stoan we rechte woarom word’n we grôot
En woarom keun’n we lach’n van woar kom’n die troan’n
En woarom stoan de bjèn’n bov’n de voet’n

Paatje keun dje mie hôor’n zei Zjoske
Paatje keun dje mie zien
Paatje zei je moe wil dje sloap’n zei Zjoske
Moe ‘k u noa de zetel bryng’n
Paatje keun dje mie hôor’n
Paatje keun dje mie zien
Paatje zei je moe wil dje sloap’n
Moe ‘k u noa de zetel bryng’n

Woarom zyn w’ aan ’t lev’n woarom goan we dôod
Woarom stoan we rechte woarom word’n we grôot
En woarom keun’n we lach’n van woar koom’n die troan’n
En woarom stoan de bjèn’n bov’n de voet’n

En de toafels van zeven lukten ôok nie meer
En ôok die van acht en van negen
En de toafels van tiene moest ie nie aan begunn’n
Want ie moest een joarke noar beneen
En Zjoske zwygt en staart nu nog mjèr
En verdwijnt alsan recht in een hoekske
Ie kykt noa zyn voet’n en ton noa zyn bjèn’n
En begint ton stillekes te skrjèm’n
Met al die grôote vroag’n van ‘t leven

Woarom zyn w’ aan ’t lev’n  woarom goan we dôod
Woarom stoan we rechte woarom word’n we grôot
En woarom keun’n we lach’n van woar kom’n die troan’n
En woarom stoan de bjèn’n bov’n de voet’n